काठमाडौं (सार्वजनिक) । त्रिभुवन अन्तर्राष्ट्रिय विमानस्थल भन्सारबाट जाँच पास भएको सुन बरामद प्रकरणमा भन्सार विभागले छानबिन थालेको छ ।
प्रारम्भिक चरणमा उक्त सुन जाँच पासमा संलग्न सबैलाई निलम्बनको तयारी गरिएको हो । बरामद गरिएको सुन करीव एक अर्ब रुपैयाँ बढीको रहेको विभागका महानिर्देशक शोभाकान्त पौडेलले जानकारी दिनुभयो । ‘केहीबेरमा जाँचपासमा संलग्न सबै कर्मचारीहरुबारे निर्णय हुने बताउनु हुँदै महानिर्देशक पौडलेले भन्नुभयो ‘हामीले आन्तरिक छानबिन तीव्र पारेका छौं, जाँच पासमा संलग्न सबै निलम्बन हुन्छन् ।’
विभागले भन्सारबाट सुन पास भएको विषय संगठित रुपमा भएको हो वा प्राविधिक कमजोरीमा तस्करले फाइदा उठाएको हो भन्नेबारे विभागले अनुसन्धान अघि बढाएको महानिर्देशक पौडेलले बताउनुभयो ।
त्रिभुवन अन्तर्राष्ट्रिय विमानस्थल स्रोतका अनुसार, बरामद सुन मंगलबारको क्याथे फ्यासिफिकको उडानमार्फत काठमाडौं आएको थियो । मोटरसाइकल र स्कुटरको ब्रेक शुभित्र लुकाएर ल्याएको सुन बुधबार भन्सार जाँच पास गरेर अपराह्न २ बजे कटेको सूचना पाएपछि राजश्व अनुसन्धान विभागले गरेको कारबाहीको क्रममा ठूलो परिमाणमा सुन बरामद भएको थियो ।
यो प्रकरणमा एक भारतीय नागरिकसहित ६ जना पक्राउ परेका छन् ।
बरामद भएको सुनको परिमाण भने एकिन भइसकेको छैन । विभागले बरामद भएको सुनको जोख्न राष्ट्र बैंक लैजाने जनाएको छ ।
