अन्जना राई (अन्जु)
ओखलढुंगा (सार्वजनिक) । जिल्लाकोे दुर्गम क्षेत्रमै ‘एक्स–रे’ सेवा शुरु भएपछि स्थानीयले खुसी व्यक्त गरेका छन् । खिजीदेम्बामा निर्माणाधिन खिजीफलाटे आधारभूत अस्पतालमा ‘एक्स–रे’ सेवा शुरु भएसँगै स्थानीयहरु हर्षित भएका हुन् । स्थानीय एक घाइते बालकको हातको उपचारबाट औपचारिक रुपमा अध्यक्ष गम्बु शेर्पाले सेवा आरम्भ गर्नुभएको स्वास्थ्य प्रमुख इन्द्रप्रसाद गौतमको भनाइ छ ।
गाउँपालिकाको वडा नं. ५ मा अवस्थित अस्पतालमा यसअघि आँखा उपचार र आँखाको एक्सरे विधि शुरु भएको थियो । दुर्गम क्षेत्रमा एक्स–रे शुरुभएसँगै सामान्य चोटपटक घाइतेहरु घण्टौं धाएर सदरमुकाम ओखलढुंगा, छिमेकी जिल्ला रामेछापको मन्थली र काठमाडौं आउनुपर्ने वाध्यता हटेको अध्यक्ष शेर्पाले जानकारी दिनुभयो ।
आर्थिक बर्ष २०७८।७९ मा गाउँपालिकाले विजियोजन गरे २५ लाख रुपैयाँ बजेटबाट एक वर्षअघि नै एक्स–रे मेसिन खरीद गरिएपनि विद्यूत आपूर्ति लगायत अन्य समस्याका कारण जडान हुन सकेको थिएन ।
केही समय अघि गाउँपालिकाले रेडियोग्राफर नियूक्ति गरेसँगै सोमबारबाट सुचारु गरिएको प्रमुख प्रशासकीय अधिकृत डम्बररजन मगरले जानकारी दिनुभयो । एक्स–रे सेवा सुचारु गरिएपनि पुर्ण रुपमा सञ्चालन गर्न अझै केही समय लाग्ने जनाइएको छ ।
अस्पतालले यसअघि अल्ट्रासाउण्ड, दिसापिसाव, इ.सी.जी, खकार र रगतको सामान्य परीक्षण सेवाहरु प्रदान गर्दै आएको छ भने एक्स–रे यन्त्रबाट हड्डी टुट्फुट भएको, हड्डी खिइएको, फोक्सो र पेटमा पानी जमे–नजमेको पत्ता लगाउन सकिने डा. चन्द्र राईले जानकारी दिनुभयो ।
